ឃាត់ខ្លួនជនសង្ស័យចំនួន៣នាក់ ករណីអំពើលួចមានស្ថានទម្ងន់ទោស(កាច់សោម៉ូតូ) និងប្រើប្រាស់ដោយខុសច្បាប់នូវសារធាតុញៀន

សៀមរាប៖កម្លាំងអធិការដ្ឋាននគរបាលក្រុងសៀមរាបបានធ្វើការបង្ក្រាប ករណីអំពើលួចមានស្ថានទម្ងន់ទោស(កាច់សោម៉ូតូ) និងប្រើប្រាស់ដោយខុសច្បាប់នូវសារធាតុញៀន ឃាត់ខ្លួនជនសង្ស័យបានចំនួន៣នាក់ នៅម៉ោង០១ និង ០០នាទី អាធ្រាត្រឈានចូលថ្ងៃទី១៩ ខែតុលា ឆ្នាំ២០២៦នេះ ។
ដោយអនុវត្តតាមអនុសាសន៍ណែនាំដ៏ខ្ពង់ខ្ពស់របស់ ឯកឧត្ដម នាយឧត្ដមសេនីយ៍ ស ថេត អគ្គស្នងការនគរបាលជាតិ និងមានការចង្អុលដឹកនាំពីលោក ឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តសៀមរាប លោក វរសេនីយ៍ឯក ដា ចំរើន អធិការនគរបាលក្រុងសៀមរាប សហការជាមួយ កម្លាំងនគរបាលចរាចរណ៍ផ្លូវគោក និងការិយាល័យនគរបាលព្រហ្មទណ្ឌកម្រិតស្រាល ។

យោងតាមសមត្ថកិច្ចបានបញ្ជាក់ថា បន្ទាប់ពីទទួលបានសេចក្តីរាយការណ៍នៅថ្ងៃទី១៨ ខែតុលា ឆ្នាំ២០២៦ វេលាម៉ោង ២៣ និង ៣០ នាទី ថា នៅចំណុចមុខព្រលានជល់ដំរី ក្នុងភូមិ
នគរក្រៅ សង្កាត់គោកចក ក្រុងសៀមរាប ខេត្តសៀមរាប មានករណីអំពើលួចកាច់សោកម៉ូតូ ចំនួន ២គ្រឿង មានម៉ាក
ហុងដាឌ្រីម ស៊េរីឆ្នាំ២០២៥ បិទតំឡើងស៊េរី២០២៦ ពណ៌ខ្មៅ របស់ជនរងគ្រោះ ឈ្មោះវិត វឿន ភេទប្រុស និងម៉ាកហុងដាឌ្រីម ស៊េរីឆ្នាំ២០២៦ ពណ៌ខ្មៅ របស់ជនរងគ្រោះឈ្មោះម៉ាប់ ស្រីនិច ភេទស្រី អាយុ២៣ឆ្នាំ ខណៈពេលដែលជនរងគ្រោះទាំងពីរទុកម៉ូតូចោល ហើយនាំគ្នាចូលមើលកម្មវិធីប្រដាល់ ក្រោយពីទទួលសេចក្តីរាយការណ៍សមត្ថកិច្ចបានចេញល្បាត លុះនៅម៉ោង០១ និង ០០នាទី អាធ្រាត្រឈានចូលថ្ងៃទី១៩ ខែតុលា ឆ្នាំ២០២៦ ទើបឃាត់ខ្លួនជនសង្ស័យខាងលើបានជាបន្តបន្ទាប់ រួមទាំងវត្ថុតាងម៉ូតូជនរងគ្រោះចំនួន ២គ្រឿង និងម៉ូតូជនសង្ស័យចំនួន១គ្រឿង យកមកសួរនាំ ក្រោយពីសួរនាំជនសង្ស័យទាំងបី បានឆ្លើយដូចគ្នាថា ពិតជាបានធ្វើសកម្មភាពលួចម៉ូតូខាងលើពិតប្រាកដមែន ។

វត្ថុតាងដកហូតមាន ម៉ូតូជនរងគ្រោះចំនួន ២គ្រឿង និងម៉ូតូជនសង្ស័យចំនួន ១គ្រឿង សោកែច្នៃចំនួន ១គ្រាប់ សោខ្សៀលេខ៨ ចំនួន១ កូនសោម៉ូតូបញ្ឆោតមិនទាន់កែច្នៃចំនួន ១គ្រាប់ និងទូរស័ព្ទចំនួន ៣គ្រឿង ។ (វត្ថុតាងបានប្រគល់ជូនជនរងគ្រោះវិញ) សមត្ថកិច្ចបានធ្វើតេស្តស្វែងរកសារធាតុញៀនលើជនសង្ស័យខាងលើ ជាលទ្ធផល ឈ្មោះ ជា ចំរើន វិជ្ជមាន (ជាតម្រុយមេតំហ្វេតាមីន)។

បច្ចុប្បន្នជនសង្ស័យខាងលើ ត្រូវបានបញ្ជូនទៅកម្លាំងការិយាល័យជំនាញ ដើម្បីបន្តនីតិវិធី ៕