នគរបាលក្រុងសៀមរាប ឃាត់ខ្លួនមនុស្ស២នាក់ ករណី ក្លែងបន្លំឯកសារសាធារណៈ(ធ្វើត្រារដ្ឋបាលសង្កាត់ និងត្រាឈ្មោះ ហត្ថលេខីចៅសង្កាត់ ក្លែងក្លាយ )

សៀមរាប៖ករណីជនសង្ស័យចំនួន២នាក់ បានក្លែងបន្លំឯកសារសាធារណៈ(ធ្វើត្រារដ្ឋបាលសង្កាត់ និងត្រាឈ្មោះហត្ថលេខីចៅសង្កាត់ ក្លែងក្លាយ ) ត្រូវកម្លាំងនគរបាល
ក្រុងសៀមរាបសាវជ្រាវឃាត់ខ្លួនបានចំនួន២នាក់យកមកសួរនាំ ។ ដោយមានការយកចិត្តទុកដាក់ជាប្រចាំពីសំណាក់ ឯកឧត្តម ប្រាក់ សោភ័ណ អភិបាលខេត្ត និងជាប្រធានគណៈបញ្ជាការឯកភាពខេត្តសៀមរាប និងមានការចង្អុលដឹកនាំពីលោក ឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តសៀមរាប លោកវរសេនីយ៍ឯក ដា ចំរើន អធិការនគរបាលក្រុងសៀមរាប បានឃាត់ខ្លួនជនសង្ស័យចំនួន ២នាក់ ពាក់ព័ន្ធនឹងករណី ក្លែងបន្លំឯកសារសាធារណៈ (ធ្វើត្រារដ្ឋបាលសង្កាត់ និងត្រាឈ្មោះហត្ថលេខីចៅសង្កាត់ ក្លែងក្លាយ ) បន្ទាប់ពីសមត្ថកិច្ចទទួលទទួលសេចក្ដីរាយការណ៍ កាលពីថ្ងៃទី០៣ ខែតុលា ឆ្នាំ២០២៦ វេលាម៉ោង១៤ និង០០នាទី ថាមានករណី លួចធ្វើត្រារដ្ឋបាលសង្កាត់ និងត្រាឈ្មោះហត្ថលេខី ក្លែងក្លាយ ពីរោងបោះពុម្ពមួយកន្លែង
យីហោតារារះ ស្ថិតនៅក្នុងភូមិដកពោធិ៍ សង្កាត់ស្លក្រាម ក្រុង-ខេត្តសៀមរាប ដែលមានម្ចាស់ឈ្មោះ ឃាម ខេមរៈ ភេទប្រុស អាយុ៣៧ឆ្នាំ ស្នាក់នៅក្នុងរោងពុម្ពខាងលើ ក្រោយពីសមត្ថកិច្ចបានទទួលបានសេចក្ដីរាយការណ៌ សមត្ថកិច្ចបានចុះទៅដល់កន្លែងកើតហេតុភ្លាមៗ និងធ្វើការស្រាវជ្រាវ រហូតកំណត់អត្តសញ្ញាណជនសង្ស័យបាន ទើប
នៅវេលាម៉ោង១៦ និង៣០នាទី ថ្ងៃដដែល សមត្ថកិច្ចបានធ្វើការឃាត់ខ្លួនជនសង្ស័យទាំងពីរ រួមទាំងវត្ថុតាង (ត្រារដ្ឋបាលសង្កាត់ និងត្រាឈ្មោះហត្ថលេខី ក្លែងក្លាយ) យកមកធ្វើការ
សួរនាំ ក្រោយពីសួរនាំ ជនសង្ស័យឈ្មោះ ឃាម ខេមរៈ បានឆ្លើយសារភាពថា ខ្លួន ពិតជាបានទទួលធ្វើត្រារដ្ឋបាលសង្កាត់ និងត្រាឈ្មោះ ហត្ថលេខី (ក្លែងក្លាយ) ពីជនសង្ស័យឈ្មោះ ជា ស៊ីថា ពិតប្រាកដមែន ដោយមិនមានលិខិតអនុញ្ញាតអ្វីនោះទេ ។

វត្ថុតាងដកហូត៖ ត្រារដ្ឋបាលសង្កាត់ស្វាយដង្គំក្លែងក្លាយ ចំនួន១ ត្រាឈ្មោះហត្ថលេខីចៅសង្កាត់ ចំនួន១។
សមត្ថកិច្ចបានធ្វើតេស្តស្វែងរកសារធាតុញៀនតាមរយៈទឹកនោម លើជនសង្ស័យទាំងពីរខាងលើ ជាលទ្ធផល អវិជ្ជមាន។ បច្ចុប្បន្នជនសង្ស័យខាងលើ ត្រូវបានបញ្ជូនទៅកម្លាំងការិយាល័យជំនាញ ដើម្បីបន្តនីតិវិធី ៕