ប្រព័ន្ធអេឡិចត្រូនិកចុះបញ្ជីផ្តល់ថ្នាំបង្ការ EIR គឺជាថ្នាលឌីជីថលដែលប្រើប្រាស់ជំនួសឱ្យការកត់ត្រាប្រវត្តិនៃការចាក់ថ្នាំបង្ការដោយដៃ ទៅជាការកត់ត្រាតាមប្រព័ន្ធឌីជីថលស្វ័យប្រវត្តិ។ ចំណែកឯ ប្រព័ន្ធគ្រប់គ្រងព័ត៌មានមូលដ្ឋានសុខាភិបាល HFMIS គឺជាប្រព័ន្ធមេដែលប្រមូលផ្តុំរាល់ទិន្នន័យសុខាភិបាលទាំងអស់ពីគ្រប់មន្ទីរពេទ្យ និងមណ្ឌលសុខភាពទូទាំងប្រទេស។ មុនពេលដាក់ដំណើរការ ប្រព័ន្ធនេះត្រូវបានដាក់ប្រើប្រាស់សាកល្បងមណ្ឌលសុខភាព និងមន្ទីរពេទ្យរដ្ឋចំនួន៣ រយៈពេលជាង១ឆ្នាំ។ ជាលទ្ធផលប្រព័ន្ធនេះ ត្រូវបានទទួលការសាទរ និងទទួលបានជ័យជោគរហូតឈានទៅប្រកាសដាក់ឱ្យប្រើប្រាស់ជាផ្លូវការនៅតាមមន្ទីរពេទ្យជាតិ មន្ទីរពេទ្យខេត្ត មន្ទីរពេទ្យបង្អែកស្រុក មណ្ឌលសុខភាព និងប៉ុស្តិ៍សុខភាពទូទាំងប្រទេស។

ក្នុងពិធីដាក់ឱ្យប្រើប្រាស់ប្រព័ន្ធ EIR និង HFMIS លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ បានលើកឡើង ថាប្រព័ន្ធទាំងពីរនេះជាសមិទ្ធផលដ៏ធំមួយដែលក្រសួងប្រៃសណីយ៍ និងក្រសួងសុខាភិបាល បានធ្វើការ និងសិក្សារួមគ្នា ដើម្បីជំរុញលើការផ្ដល់សេវាសុខាភិបាលកាន់តែមានភាពទំនើប និងងាយស្រួលសម្រាប់ពលរដ្ឋ។